जळगाव :तापी पाटबंधारे विकास महामंडळातील कथित भ्रष्टाचार, बनावट कागदपत्रे व गैरव्यवहाराचा पर्दाफाश करणाऱ्या अजय भागवत बढे यांना थेट जिवे मारण्याची धमकी पाटबंधारे प्रकल्प मंडळाचे प्रभारी अधीक्षक अभियंता गोकुळ श्रावण महाजन यांनी दिल्याचा आरोप अजय बढे यांनी केला.
ही घटना दि. २२ सप्टेंबर रोजी घडळी. तापी पाटबंधारे विभागाच्या गैरप्रकारबाबत अजय बढे यांनी केलेल्या तक्रारीवर मुख्य अभियंता यांच्या आदेशानुसार चौकशी करणारे लाभ क्षेत्र विकास प्राधिकरणाचे अधिक्षक अभियंता श्री.भोसले यांना तक्रारीशी संबंधित कागदपत्रे देण्यासाठी अजय बढे दुपारी १२ वाजता गेले होते.मात्र, लाभ क्षेत्र विकास प्राधिकरणाचे अधिक्षक अभियंता श्री.भोसले कार्यालयात नसल्याने बढे तेथून बाहेर पडत असताना खालच्या मजल्यावर असलेल्या जळगाव पाटबंधारे प्रकल्प कार्यालयाचे अधिक्षक अभियंता गोकुळ श्रावण महाजन उभे होते.
अजय बढे यांना पाहताच महाजन यांनी “आमच्या विरोधात तक्रारी करतोस का… तुझा कार्यक्रम लावून टाकतो, जीव वाचणार नाही तुझा” असे धमकाल्याचा आरोप केला आहे.या प्रकरणी जिल्हा पेठ पोलीस ठाण्यात अदखलपात्र गुन्हा नोंदवण्यात आला आहे.
अजय बढे यांनी ही जिल्हा पोलीस अधीक्षकांकडे अर्ज देवून संरक्षण देण्याचे मागणी केले आहे.
याबाबत त्यांची बाजू जाणून घेण्यासाठी संपर्क केला असता अधिक्षक अभियंता गोकुळ श्रावण महाजन यांच्याशी संपर्क होऊ शकला नाही.
