महानगरपालिकेच्या निवडणुकीत आरपीआयचा दावा,महानगरपालिकेत चार जागांची मागणी

जळगांव दि. 17 (धर्मेंद्र राजपूत) जळगाव आगामी होणाऱ्या जळगाव शहर महानगरपालिका निवडणुकीच्या पार्श्वभूमीवर राजकीय समीकरणांना वेग आला आहे. याच अनुषंगाने रिपब्लिकन पार्टी ऑफ इंडिया (आठवले) पक्षाने महायुतीकडे चार (4) जागांची मागणी केली आहे. या मागणीचे निवेदन शुक्रवारी जळगांव शहराचे आमदार राजू मामा भोळे आणि भाजपचे महानगर जिल्हाध्यक्ष दीपक सुर्यवंशी यांना जी.एम. फाऊंडेशन येथील कार्यालयात देण्यात आले.या वेळी रिपब्लिकन पार्टी ऑफ इंडिया (आठवले) पक्षाचे शहराध्यक्ष अनिल अडकमोल यांच्यासह राजेश साळुंखे, प्रताप बनसोडे, शंकर सोनवणे, किरण अडकमोल पदाधिकारी आणि कार्यकर्ते उपस्थित होते.

अनिल अडकमोल यांनी सांगितले की, “लोकसभा आणि विधानसभा निवडणुकांमध्ये रिपब्लिकन पार्टी ऑफ इंडिया (आठवले) पक्षाने महायुतीच्या उमेदवारांच्या विजयासाठी शहरात मनापासून प्रचार केला. इनाम ईतबारे कार्य केले असून महायुतीच्या धर्मनिष्ठतेच्या भावनेतून आम्हाला देखील सत्तेत सहभागाची संधी मिळावी ही अपेक्षा आहे.”अडकमोल यांनी पुढे सांगितले की, “महानगरपालिकेतील पाच अनुसूचित जाती प्रभागांपैकी चार प्रभाग रिपब्लिकन पार्टी ऑफ इंडिया (आठवले) पक्षाला सोडावेत. त्यामुळे पक्षालाही स्थानिक स्वराज्य संस्थेत प्रतिनिधित्व मिळेल आणि महायुतीचा पाया अधिक मजबूत होईल.”

महानगरपालिकेच्या निवडणुकीत महायुती घटक पक्षांमध्ये जागा वाटपाची चर्चा सुरू असून आरपीआय (आठवले) पक्षाची ही मागणी आता महत्त्वाची ठरण्याची शक्यता आहे.