जळगाव शहरात १२ ते १६ ऑगस्ट दरम्यान पर्यावरण महोत्सवाचे आयोजन

जळगाव (धर्मेंद्र राजपूत) दि.6: जळगाव शहर महानगरपालिका, नाशिक येथील ‘हिरवांकुर संस्था’ आणि जळगावच्या ‘ग्रीन सिटी फाउंडेशन’ यांच्या संयुक्त विद्यमाने शहरात येत्या १२ ते १६ ऑगस्ट दरम्यान विविध पर्यावरणपूरक उपक्रम व प्रदर्शनाचे भव्य आयोजन करण्यात आले आहे. या महोत्सवाची सविस्तर माहिती देण्यासाठी आज, गुरुवारी महापौर दीपमाला काळे यांनी  पत्रकार परिषदेचे आयोजन केले होते.

पत्रकार परिषदेला संबोधित करताना महापौर दीपमाला काळे यांनी सांगितले की, “हा महोत्सव केवळ एक प्रदर्शन नसून ही पर्यावरण संवर्धनाची एक मोठी चळवळ आहे. जळगाव शहर स्वच्छ आणि हरित राहावे यासाठी आमचे सातत्याने प्रयत्न सुरू आहेत. या मोहिमेत सर्व जळगावकरांनी उत्स्फूर्तपणे सहभाग नोंदवावा.”

सायकल रॅली, वृक्षदिंडी अन् पर्यावरण प्रदर्शन !

या पाच दिवसीय महोत्सवाच्या रूपरेषेबद्दल माहिती देताना महापौरांनी प्रमुख बाबी मांडल्या. उद्घाटन बुधवार, १२ ऑगस्ट रोजी सकाळी १० वाजता नूतन मराठा महाविद्यालय येथे या महोत्सवाचे दिमाखदार उद्घाटन होईल. उद्घाटनापूर्वी शहरातून जनजागृतीसाठी भव्य सायकल रॅली आणि वृक्षदिंडी काढण्यात येणार आहे. १२ ते १६ ऑगस्टदरम्यान हे पर्यावरण प्रदर्शन सर्व नागरिक, महिला आणि विद्यार्थ्यांसाठी विनामूल्य खुले राहणार आहे.

“इंदूर शहराची ओळख जशी देशातील ‘सर्वात स्वच्छ शहर’ म्हणून आहे, त्याच धर्तीवर आपल्या जळगाव शहरालाही स्वच्छ आणि सुंदर बनवायचे असेल, तर प्रत्येक नागरिकाचा सहभाग अत्यंत महत्त्वाचा आहे. सर्वांनी आपले घर आणि परिसर स्वच्छ राहील यासाठी पुढाकार घ्यावा.”

— दीपमाला काळे, महापौर, जळगाव

या पत्रकार परिषदेला नाशिक येथील हिरवांकुर फाउंडेशनचे प्रमुख निलयबाबू जैन शाह, जळगाव ग्रीन सिटीचे संचालक विजयकुमार वाणी, नलिनी शाह आणि कांचन वाणी, आशिष सिंग हाडा यांच्यासह महापालिकेचे अधिकारी व पदाधिकारी उपस्थित होते. या अनोख्या पर्यावरण महोत्सवात शाळा-कॉलेजचे विद्यार्थी आणि नागरिकांनी मोठ्या संख्येने उपस्थित राहून उपक्रमाचा लाभ घ्यावा, असे आवाहन आयोजकांच्या वतीने करण्यात आले आहे.