रामेश्वर कॉलनी परिसरातील साई गजानन सोसायटीत 20 दुचाकी जळून खाक; माथेफिरूचे कृत्य? की ई-बाईकचा स्फोट?
जळगाव:(जळगांव टाईम्स)दि.14 शहरातील रामेश्वर कॉलनी परिसरातील साई गजानन सोसायटीमध्ये आज (१४ फेब्रुवारी) पहाटे २ वाजेच्या सुमारास भीषण आगीची घटना घडली. या आगीत सोसायटीच्या पार्किंगमध्ये उभ्या असलेल्या सुमारे 20 हुन अधिक दुचाकी पूर्णपणे जळून खाक झाल्या आहेत. या घटनेमुळे संपूर्ण परिसरात खळबळ उडाली असून कष्टकरी कुटुंबांचे मोठे आर्थिक नुकसान झाले आहे.
नेमकी घटना काय?
मिळालेल्या माहितीनुसार, मध्यरात्री गाढ झोपेत असताना अचानक पार्किंगमधून आगीच्या ज्वाळा दिसू लागल्या. काही वेळातच आगीने रौद्र रूप धारण केल्याने एकापाठोपाठ एक अशा 20 गाड्या आगीच्या भक्ष्यस्थानी पडल्या. रहिवाशांनी तातडीने आग विझवण्याचा प्रयत्न केला, मात्र तोपर्यंत गाड्यांचे सांगाडे उरले होते. घटनेची माहिती मिळताच पोलीस यंत्रणा घटनास्थळी दाखल झाली असून पंचनामा सुरू करण्यात आला आहे.
घातपाताची की तांत्रिक बिघाडाची शक्यता?
या घटनेबाबत परिसरात दोन मुख्य चर्चा सुरू आहेत:
१. माथेफिरूचे कृत्य: कुणीतरी अज्ञात व्यक्तीने जाणीवपूर्वक ही आग लावली असावी, असा संशय व्यक्त केला जात आहे.
२. इलेक्ट्रिक बाईकचा स्फोट: पार्किंगमधील एखाद्या इलेक्ट्रिक बाईकच्या बॅटरीचा स्फोट होऊन ही आग इतर वाहनांपर्यंत पसरली असावी, अशीही शक्यता वर्तवण्यात येत आहे.
सत्य शोधण्यासाठी पोलीस सध्या सोसायटीतील सीसीटीव्ही फुटेज तपासत आहेत.
